(افتح قلبك مع د. هبة ياسين).. أسيبه ولا أمسك فيه؟

الجمعة، 30 سبتمبر 2011 - 04:35 م

د. هبة ياسين

أرسلت (ن. م) إلى "افتح قلبك" تقول:

أنا فتاة عمرى 32 سنة، ما تجوزتش لغاية دلوقتى لأكتر من سبب، أولا لأنى كنت طول الفترة اللى فاتت دى مركزة جدا فى شغلى وفى دراساتى العليا، وثانيا لأنى مارتاحتش لأى شخص من اللى اتقدموا لى قبل كده، ماحاولتش أدخل فى علاقات مع أى حد، والكل بيشهد بأخلاقى وسمعتى واحترامى.

اتعرفت على شاب مؤخرا، أخلاقه كويسه جدا، ومستواه الاجتماعى مرتفع، وأعلى من مستوانا كعائله، حصل بينا تفاهم وتآلف بسرعة، وبقينا فعلا نفهم بعض من غير كلام، وحسيت أخيرا إنه ربنا عوض صبرى خير، وأرسل لى الإنسان اللى ممكن يفهمنى ويسعدنى ويريحنى، واللى أقدر أسعده، وأكون له الزوجة اللى يتمناها، لغاية دلوقتى كله كويس، ومفيش مشاكل، مش كده، لكن المشكلة المستخبية هى إنه عمره 27 سنة، يعنى أصغر منى بخمس سنين بحالهم، ودى طبعا حاجة مش ممكن تعدى كده ببساطة بالنسبة لأهله على الأقل.

اتكلمنا كتير فى موضوع فارق السن ده، وهو أكد لى إنه متمسك بيا، وأنه عمره ما هايفرط فى الإنسانة اللى بيدور عليها من زمان عشان حاجه زى دى، حاولت أفهمه أن أكيد أهله هايعارضوا، وأكيد هايحاولوا يضغطوا عليه عشان يبعد عنى، لكن هو فضل ثابت على موقفه طول الوقت، حتى إنى طلبت منه إننا نجرب ونحاول نبعد عن بعض لغاية ما يفاتح أهله، لكنه هو اللى رجع فى كلامه واتصل بيا تانى يوم، وحاول يطمننى إنه حتى لو أهله رفضوا وهو نفسه متأكد من كده، هو ها يفضل وراهم لغاية ما يتأكدوا إنه مش هايغير رأيه ومش هايرتبط بحد غيرى.

هو دلوقتى فى الجيش، فى منطقه بعيدة، ولسه أدامه كام شهر على ما يخلص جيشه، وده مانعه إنه يفاتح أهله فى موضوعنا، لأنه عايز يكلمهم بشكل مباشر، ويكون معاه وقت للنقاش والتفاوض معاهم، وأنا قلقانه بشكل محدش يتخيله، كل يوم بافكر ياترى الموضوع ده هايتم؟, ياترى هاينجح هو فى الضغط على أهله ولا هم اللى هاينجحوا فى الضغط عليه؟، ياترى نسيب بعض من دلوقتى ومفيش داعى للتعلق بالحبال الدايبة لغاية السنة الجايه؟, ياترى أفضل مرتبطة بيه واتعلق بيه وأعلقه بيا كل يوم زيادة؟ ولا أبعد تماما وانسحب من حياته إلى الأبد وأخدها من قصيرها؟.

أوقات كتير باحس إنه فعلا هدية ربنا ليا، لأنى كنت طول عمرى براعى ربنا وبخافه، وباقول فى نفسى وإيه يعنى أنا أكبر منه؟ لكن أوقات تانيه باشوف إن حكايتنا دى محكوم عليها بالفشل لا محالة، وإنها مسألة وقت، وإنه مفيش داعى نعذب بعض بالارتباط أكتر من كده.

كلما أتخيل حياتى بدونه وأفكر إنى هارجع وحيدة من تانى، أشعر باختناق واكتئاب وبكل المشاعر الوحشة اللى فى الدنيا، وهو كمان كل ما أكلمه فى إن إحنا لازم نبعد عن بعض يقول لى حرام عليكى إنتى بتعذبينى بالكلام ده، وهاتكتبى عليا العذاب طول عمرى من بعدك، حتى إنه فى آخر مكالمى بيننا بكى لما كلمته فى الموضوع ده.

قلقانه، وخايفه، وتعبانه، والموضوع ده بدأ يؤثر على تركيزى وشغلى ونومى، وبجد مش عارفه أعمل إيه، تنصحينى بإيه يا دكتوره؟.

إلى (ن) أقول:

عادة فى الأحوال اللى بيكون فيها البنت أكبر من الولد سنا، بتكون المشكلة عند الولد، وبتلاقيه هو إلى قلقان ومتردد، وطالب المشورة هل ينفع يتجوزها ولا لأ، لكن فى وضعك أنت العكس هو اللى حاصل، إنتى اللى قلقلنه وخايفه وتعبانه ليه؟، ارتباطك بشخص أصغر منك لا هو عيب ولا حرام، هو فقط غير معتاد فى مجتمعنا، لكن مين قال إن كل الأمور المعتادة صح، وإن كل الأمور غير المعتادة غلط؟، ماتشغليش بالك بكلام الناس، وهايقولوا إيه وهايعلقوا إزاى، المهم إنكم أنتم الاتنين متفاهمين وراضيين ومبسوطين، ماتخليش كلام الناس (الفاضى) وهيافاتهم يبوظوا عليكى فرحتك بأنك لقيتى أخيرا اللى كنتى بتدورى عليه من زمان.

بتسألى تحاربى معاه عشان ترتبطوا ولا تنسحبى من حياته؟، ودى عايزه سؤال؟، طبعا تحاربى، ولآخر نفس كمان، مش معنى إنك عندك 32 سنة، وإنك أكبر منه إنك معيوبة، أو ناقصك حاجة، أو إن ارتباطه بيكى شىء مشين، أنت إنسانة محترمة، وحافظتى على نفسك وعشتى عمرك كله بتحلمى بشخص يفهمك وتفهميه، ورفضتى الدخول فى علاقات وتجارب طول الوقت اللى فات ده يبقى إنت واحدة جديرة بالتعب عشانها، ولازم تثقى بأنك مش أقل من أى واحدة تانيه كان ممكن يرتبط بيها حبيبك برضا وموافقة ومباركة أهله.

وهو الإنسان الى بيكملك وبيفهمك، وبيحبك وبتحبيه، ومتمسك بيكى ومستعد يواجه أهله عشانك، وعنده الوعى بأن السن مش هو اللى هايبعده عن الإنسانة اللى اختارها يبقى هو كمان واحد يستحق الكفاح من أجله ومعاه، اصبرى معاه، وحاربى معاه، وقويه واتقوى بيه، لغاية ما ربنا يسهل لكم الحال ويسلم الآخرين بجدية رغبتكم وصدق حبكم.

الموضوع وما فيه إن الأمر غير معتاد وغير مقبول فى مجتمعنا زى ما قلت لك، عشان كده لازم تتقبلى وجود بعض المشاكل والعقبات والمتغصات فى البداية، لكن كل ده مش مبرر أبدا إنك تنسحبى وتسيبى إنسان زى ده، وتختارى بإيدك إنك تتعذبى وتعذبيه بالبعد والفراق لمجرد ان الآخرين مش عاجبهم.

خلى عندك ثقه فى ربنا وفى نفسك، وطولى نفسك ووسعى صدرك لبعض (الكعبلات)، والعقبات التى لا يخلو منها أى زواج عادى، وربنا يجمع بينكم فى خير قريبا إن شاء الله، بس إبقى فرحينا معاكى.

للتواصل مع د. هبه و افتح قلبك:
h.yasien@youm7.com

تعليقات (20)

1

ما شاء الله

بواسطة: سامح سعد

بتاريخ: الجمعة، 30 سبتمبر 2011 05:34 م

ما شاء الله عليكى يا دكتورة
اجمل حاجه ان حضرتك بتحلى المشكله بشكل حذرى مش تحطى اكتر من حل وتخلى الى قدامك بتوه .. ربنا يبارك فيكى .وانا بضم صوتى لحضرتك .. وبقولها اتمسكى دى حياتك انتى وهوا .. وقريب عاوز اكتبلك مشكلتى .. بالتوفيق

2

ههههههههههههههههه

بواسطة: مهند

بتاريخ: الجمعة، 30 سبتمبر 2011 06:15 م

يا حاجة سيببى الواد يشوف حياتة مع بنت صغيرة موزة يعنى 22سنة دة انتى فى سن امة يعنى تشوفيلك واحد 4045يادوب كدة هههههههههههه

3

الامل فى الله كبير

بواسطة: خالد المصرى

بتاريخ: الجمعة، 30 سبتمبر 2011 06:33 م

نصيحه يا دكتوره الجوزه دى متنفعش علشان الولد ميخسرش اهله ولا يندم بعد كدة الجواز تكافو

4

نصيحه خالصه لوجه الله

بواسطة: ام انس

بتاريخ: الجمعة، 30 سبتمبر 2011 07:24 م

اولا ليس هناك مشكله فالرسول صلى الله عليه وسلم تزوج من السيده خديجه رضى الله عنها وكانت اكبر منه ب15 سنه تقريبا ل ثانيا ا لعلاقه لاتجوز شرعا لانه مازال اجنبى عنك فمن يتقى الله يجعل له مخرجا

5

رقم2

بواسطة: MAFIA II

بتاريخ: الجمعة، 30 سبتمبر 2011 07:31 م

انت ملكش حل هههههههههههههههههههههه

6

why not

بواسطة: mohammed eldeib

بتاريخ: الجمعة، 30 سبتمبر 2011 07:57 م

سلام الله عليكم
اقول ولله الحق ان السيده خديجه رضى الله عنها تزوجت الرسول صلى الله عليه وسلم وعمره الخامسه والعشرون وهى في الاربعين والله الموفق ولىساعدكم الله انشاء الله تعالى بالتوفيق

7

انا معك يادكتوره

بواسطة: nadya

بتاريخ: الجمعة، 30 سبتمبر 2011 07:58 م

تمنيت ان يتزوج ابني من هي علي تلك المميزات ولا امانع اطلاقا في زواج الشاب ممن يريده قلبه حتي اذا كانت تكبره بشرط ان تكون علي خلق وللعلم انا عندى منه هو في سن الزواج حتي لا اتهم بأنني لو كان ابني مكنتش هارضي

8

رقم 2 أنــــــــت تــــعــــكـــــــــــر مـــــــاء بـــحــــــــــــــــــــــــر

بواسطة: علي عبد الحليم

بتاريخ: الجمعة، 30 سبتمبر 2011 08:02 م

اتقي الله في كل كلمة تلفظها وقد تكون من تسأل وأنا متأكد من هذا أنها تساوي مليون

شخص مثلك فليس المشكلة في السن ولكن المشكلة في الجهل والغباء

وأقول للأخت كلام الدكتورة كلة صحيح وخذي بة مع الوضع في الإعتبار أنكي سوف تقابلي

اشكال من عينة رقم 2 فهؤلاء شوطيهم من أمامك بالجزمة القديمة التي تمليكيها

9

المتخلف رقم 2

بواسطة: ياسمين

بتاريخ: الجمعة، 30 سبتمبر 2011 08:02 م

انت قليل الادب و مش بتفهم فى الزوق

10

انا معاهم للآخر

بواسطة: engbokle

بتاريخ: الجمعة، 30 سبتمبر 2011 08:05 م

اختي الكريمة
أسأل الله العظيم أن يرضى عنك ويعطيكي أجر محافظتك على نفسك خيرا
عموما زي ما الدكتورة قالت لحضرتك كده مفيش أي غلط ولا حرمة فالموضوع
الامر بينكم انتم الاثنين لو هو فعلا يقدر يقنع أهل دا بإعتبار انهم هيرفضو
انت الوحيدة اللى ممكن تقدري تحددي هينجح في إقناعهم ولا لأ من خلال معرفتك بشخصيته
وعموما الوقت مش كتير لما الشهور دي هتعدي
أطلبي العون من الله ولايمكن يخذلك بإذنه

11

ارحم ياعم

بواسطة: مفيش فيدة

بتاريخ: الجمعة، 30 سبتمبر 2011 08:20 م

عندك حاجه تقولها او تنصح بيها قووووووووووول لكن معندكش حط لسانك واخرس مش ممكن ليها نصيب وربنا يسر لها

12

تقويه

بواسطة: احمد

بتاريخ: الجمعة، 30 سبتمبر 2011 08:28 م

ربنا يوفقك ويقدم اللي فيه الخير وقل لن يصيبنا الا ما كتب الله لنا

13

عن تجربة

بواسطة: المصري

بتاريخ: الجمعة، 30 سبتمبر 2011 08:37 م

الأخت الكريمة
ربنا يوفقكم أن شاء الله. أنا عشت نفس التجربة زوجتي أكبر مني وكان جواز عن قصة حب وأهلي كانوا وخدين موقف ولكن كنت مستعد وهى كانت عزيمتي وقوتي
الحمد لله عندنا أجمل بنت فى الدنيا والتاني فى الطريق وعايز أقولك أنا حاسس أني أسعد زوج فى الدنيا على الاقل بين أصحابي اللى بيشتكو من زوجتهم .... على بركة الله وربنا يرزقكم الذرية الصالحة أن شاء الله

14

الى البجح رقم 2

بواسطة: محمد مصطفى

بتاريخ: الجمعة، 30 سبتمبر 2011 08:57 م

انتى مناخيرك خشب مابتشمش :D

مخلوق غير بشري ومسكوه كيبورد

حاقد على الناس اللى حواليك

ماتعرفش يعني ايه زوق او تربية

بارد برود التلج

مش هديلك اكتر من كده من وقتى.

15

اتمني انه يكون مش بيضحك عليكي

بواسطة: د.مصطفي

بتاريخ: الجمعة، 30 سبتمبر 2011 10:30 م

خدي بالك كويس اوي لاني حاسس انه بيلعب عليكي
يعني تقضية وقت لحد ما يخلص الملل بتاع الجيش وبعد كدا يخترع اي قصة ويهرب منك وهو تقريبا مهد ليها كويس دلوقتي
خدي بالك من نفسك كويس اوي ومتديش عواطفك الا لزوجك بس وحافظي علي نفسك ارجوكي
وبرده علشان اللي هينقضوا كلامي ........... الله وحدة اعلم بالنفوس بس انا فقط احذرك وبعرفك الشباب بيفكر ازاي دلوقتي

16

فى الفقرة التانية ...

بواسطة: مصرى ........

بتاريخ: الجمعة، 30 سبتمبر 2011 11:06 م

فى الفقرة التانية آخر السطر التانى مين عوض صبرى ده !!!!!!؟؟؟؟؟؟
ههههههههههههههههههههه

17

التعليق 222222222222222222222

بواسطة: فتاة مصرية

بتاريخ: الجمعة، 30 سبتمبر 2011 11:32 م

اتقى ربنا ويتقول كلمة خير اما تسكت وافتكر ان ربنا موجود وهتترد ليك فى نفسك او اهل بيتك..وربنا معاكى ويوفقك ويسعدك يا صاحبة الموضوع

18

واحده صحبتى عندها مشكله قريبه شويه

بواسطة: mona

بتاريخ: السبت، 01 أكتوبر 2011 12:49 ص

واحده صحبتى عندها مشكله قريبه لكن حبها فى نفسها متقدرتش تقوله عليه بتشوفه تقريبا كل يوم فرق السن هى الاكبر تقريبا سنه او اتنين مش عارفه بالتحديد هو لسه متخرج من الكليه وهى عندها 24 وانا مش عارفه أنصحها بايه؟؟؟؟؟؟؟



صاحبة الموضوع ربنا يوفقك لما فيه الخير يارب ليكِ وليه

19

الى رقم 2

بواسطة: ياسمين

بتاريخ: السبت، 01 أكتوبر 2011 03:39 ص

لا تعلييييييييييييييييييييييييييييييييييييييييييييييييييييييييييييييييييييييييييييييييق

20

الى رقم 2

بواسطة: عاطف ابو فيروز

بتاريخ: السبت، 01 أكتوبر 2011 07:06 ص

فى مثل فى مصر بيقول انا راضى وهو راضى وانت مالك انت يا قاضى يعنى هما موافقين على بعض وانت عاوز توقف حالهم ربنا يوقف حالك يا شيخ دنيا واخره اتوكلى على الله يا حجه واتجوزى احنا بنقول يالا جوازه واهو نخفف عدد العانسات فى مصر واحده بس اتاكدى الاول ان حبيبك مش واخداه حماسه الجيش والعسكريه وربنا يوفقكم فى حربكم مع الاهل

اضف تعليق

مشاركتك بالتعليق تعنى أنك قرأت بروتوكول نشر التعليقات على اليوم السابع، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من اليوم السابع

الأكثر قراءة

الأكثر تعليقاً